Bayat ti naudi a panagsinnukat ti panagadal a naangay idi Marso 2023, adda kinagagar kadagiti home gardeners a makisinnukat iti kaammuan manipud kadagiti aktual a kapadasan da. Maysa kadagiti rekomendasion a nirumwar ket ti tuluy-tuloy a panagsinnukat iti kultura babaen iti panangisayangkat iti panagbisita kadagiti hardin. Iti daytoy a nota, nangisayangkat ti PIKP iti sabali pay a learning exchange idi Nobiembre 24, 2023 iti maysa nga urban garden a masarakan iti ruar ti Siudad ti Baguio a panggepna a palawaen ti pannakaawat kadagiti nadumaduma a klase ti makaanay a makan (sustainable food) ken sistema ti agrikultura (agriculture systems). Naglikmut ti home gardeners network iti Um-a Organic Farm ket naammuanda ti maipapan iti Indigenous Food Systems, Permaculture, ken Pranic Agriculture. Maysa kadagiti dagus a sumaruno nga addang a napagnunumuan dagiti nakipaset ket ti agtultuloy a panagurnong ken panagsinnukat ti heirloom seeds iti nagbaetan ti tunggal maysa, ken panang-organisa iti seed saving community iti Baguio City. Babaen ti suporta ti PIKP, nagkumit dagiti nakipaset a mangsustiner iti home gardeners network ken agtrabaho iti panagsilpo (linkage) dagiti mannalon iti away ken siudad.
Tipo: Artikulo
Rehiyon:Asia
Pagilian: Pilipinas
Tema: Tradisional ken lokal a kaammuan; Dagiti sustenable a pangkabiagan
Partner: Partners for Indigenous Knowledge Philippines (PIKP)
