Dagiti karbegan iti daga ken rekurso (masansan a mainaig kas ‘dagiti kalintegan iti daga, teritorio ken rekurso’) ket fundamental iti pagimbagan dagiti nainsigudan nga umili ken para iti konservasion ti biodiversidad. Ti panagsalaknib kadagiti karbengan iti daga ken rekurso ti mangsungbat kadagiti isyu kas ti di panangiraman a konservasion babaen ti panangbigbig kadagiti karbengan dagiti nainsigudan nga umili a mangtagikua, mangimanehar ken mangusar kadagiti tradisional a dagdaga ken rekursoda.
Suportatan daytoy a proyekto dagiti karbengan dagiti nainsigudan nga umili a mangtagikua ken mangimanehar kadagiti dagdaga segun kadagiti sustenable nga aramidda, ken isu a panggep daytoy nga aramiden a mas sustenable pay a porma ti konservasion. Kadagiti pagilian kas ti Kenya, daytoy a trabaho ti mangpakan iti agdama a pannakaipatungpal iti Linteg ti Daga ti Komunidad wenno Community Land Act babaen ti panagtulong kadagiti komunidad a masalakniban dagiti titulo ti komunidad tapno sustenable a maimanehar ken maiturayanda dagiti dagada.
Ni Zoraida Tinco Maldonado (40 a tawen), manipud iti umili a Quechua, ti agan-ani kadagiti mulana a mais iti maudi a paset ti Hunio. Komunidad ti Hualla, Distrito ti Hualla, Probinsiia ti Fajardo, Rehiyon ti Ayacucho, Peru. Ladawan ni Luisenrrique Becerra Velarde / CHIRAPAQ.
Dashed line
Aktibidad
Nayon nga Impormasion
Nayon nga Impormasion Masansan nga agsagsagarap dagiti nainsigudan nga umili kadagiti diskriminasion ken mailaklaksidda manipud kadagiti proseso a panagbukel iti desision a mainaig iti panangimanehar kadagiti tradisional a dagdaga ken rekursoda. Daytoy ti nangitunda kadagiti adu a pannakadadael kadagiti biag ti aglawlaw ken ti pannakapukaw iti tawid a kultura ken pagturatenna dagiti kaadduan a nakaro a karit a sangsanguen dagiti nainsigudan nga umili iti adu a paset ti lubong. Ti panangisigurado kadagiti karbengan ti daga ken rekurso ti mangsungbat kadagitoy nga isyu babaen ti panagbigbig kadagiti karbengan dagiti nainsigudan nga umili a mangtagikua, mangimanehar, ken mangusar kadagiti tradisional a daga ken rekursoda ken ti panangirupir iti panangbigbig kadagitoy a karbengan dagiti dadduma pay a maseknan. Maibilang ditoy ti karbengan iti nawaya ken siaammo a pammalubos wenno Free Prior and Informed Consent (FPIC) sakbay iti aniaman nga aktibidad a mabalin a makaapekto kadagiti dagdaga ken rekursoda.
Ditoy a proyekto, dagiti aktibidad a maibilang ti panagsanay iti tukad komunidad tapno mailawlawag dagiti plano iti panangusar iti daga, pagpilian kadagiti sustenable a pagbiagan ken panagmapa nga addaan nalawa a partisipasionna. Ti suporta dagiti inisiatiba iti tukad komunidad ket manamnama nga agturong kadagiti napatibker a panagtignay dagiti nainsigudan nga umili ken lokal a komunidad, kas kadagiti sistema a panagmonitor a nakabase kadagiti komunidad, ken ti panagurnong ken panagusar kadagiti datos ti biodiversidad kadagiti luglugarda.
Babaen ti panangidatag kadagiti napapateg a kontribusion a maaramidan dagitoy a komunidad ken teritorioda kadagiti prioridad iti nasional a biodiversidad, daytoy a proyekto ket mangpairteng iti seguridad iti panagtalinaed iti daga iti pangmabayagan a panawen.
